Characteristics of a real artist
مواصفات الفنان الحقيقى
الفنان لازم يكون له وجهة نظر فى الحياة ويكون ليه قناعاته اللى بيعتنقها وبيدعمها واللى ما بتتغيرش عشان أى أهداف أو مصالح أو سبوبة
الفنان الحقيقى..
له موقف واضح من غير ما يحاول يقنع الناس بعكس أتجاهه عشان يرضى أى حد
* واثق من نفسه من فكره وقناعاته ومبادئه اللى ما بتتغيرش
* قدوة فى أخلاقه قبل موهبته وأبداعه
* بيكون نفسه مش حد تانى ولا بيتشبه بغيره ولا بيلقط كلمتين من هنا ولا هناك عشان يقولهم ويعمل فيها مثقف
* لازم يكون مثقف وواعى ومدرك لكل حاجة حواليه
* بيكون صريح وواضح من غير لف ودوران وكلمة الحق لازم تبقى على لسانه حتى لو خسر أى حد
* مش محتاج يكون غير نفسه بكل ما فيها لأنه فى الأول والآخر أنسان له مزاياه وعيوبه
* بيواجه الحقايق مش بيخاف منها ولا بيداريها ولا بيحاول يزيفها
* ما يعرفش التهليل والتطبيل لصاحب المصلحة لأنه المفروض واثق فى نفسه وأبداعه والأهم إن الرزق بأيد ربنا و مشيئته مش بأيد حد
* لازم يكون لسان حال الشعب بيعبر عنهم ويتكلم بلسانهم
* مش لازم طول الوقت يزايد على الوطنية ويخون غيره
* المفروض يكون عارف وفاهم إن غيره مختلف عنه فى فكره وقناعاته ووجهات نظره ومش من الموضوعية فى مطالبة غيره أنهم ما يفكروش غير بعقله وبس
* بيحترم رأى غيره حتى لو أختلف معاه لأنه من حقه يعبر عن وجهة نظره و قناعاته اللى ممكن تتفق أو حتى تختلف معاه
* ما بياخدش كلام غيره ويقولوه ويردده المفروض إن ليه فكره ورأيه ووجهة نظره وأسلوبه اللى المفروض بيختلف فيه عن غيره
* مش نسخة مكررة لغيره لا فى الفكر ولا الأبداع ولا القناعات لأن ده اللى بيصنع حالة التميز والأختلاف
* اللى يقرا ويطلع ويعرف الحقايق من مصادرها مش بيعتنق أفكار غيره من غير فحص ولا تمحيص ولا تدقيق ولا حتى تفكير
وعشان كده .....الفنان الحقيقى ح يفضل طول عمره فنان ومبدع ومختلف ومتميز حتى لو فارق الحياة لأنه أكيد ح يكون أنسان مختلف ما يشبهش حد ولا حد يشبهه
ليست هناك تعليقات:
إرسال تعليق