نفضله/ طرقعله/سقعله/لخص/كبر الجمجمة/ أنزل من على ودانى/ شيل ودنك من هنا/ بيلمع أكر/ كاشات/ أقفش/ أبجني تجدنى/ عيش يا مان/ دنيارة/ بلطية/ كمروا/ على رنات/ صباحوا/صبح تاتا أتنين فى تلاتة/سلموكا فى اللوكا/أحلامك أوامر/ شلوت سعادتك دفعة لينا لقدام/شخابيط سعادتك تخطيط لمستقبلنا/خدنا عصفورة فى قفصك الصدرى/لا نار ولا حريق الباشا ع الطريق/كشكشها لا لمسمار ينتشها/ هزها تجيب رزقها/الطريق منور ليه الباشا ماشي عليه/الغزال لما يدلع يخلي الأسفلت يولع /لا عز ولا غنا ده ستر من ربنا/الحلوة تفاحة للسفر و السياحة/ عرضها و خد أيرادها/كشكشها ما تعرضهاش/صباح النور يا أمور /الحلوة م اليابان و صاحبها غلبان/سلام مطروح من قلب مجروح/الباشا يخطط و الباقى يتنطط../بيئة/عشوائيات/كداب يا خيشة/سئسئله/ولعة/لوكلوك/
كلمات بنسمعها على لسان كل شاب اليومين دول لا تفرق ده هاي ولا من تحت السلم بقت اللغة اللى بقم بيتكلموا بيها فى كل موقف ورأى حتى فى كلامهم مع البنات تحس أنك قصاد شباب ضايع بيحاول يثبت نفسه بأى طريقة كلام غريب بيتقال و يتردد على لسان كل شاب النهارده حاجة كده ما لهاش معنى شوية جمل و تعبيرات بيتقالوا لمجرد صنع حالة خاصة و الحاجة الغريبة أنك بتلاقى معظم الشباب بيستخدموها فى كل موقف و حالة و الكلام العادى ما بينهم حاجة كده زى اللغة الخاصة اللى بقم بيتكلموا بيها و سيبك بقى من الكلام المنمق ولا المثقف ولا اللى بيعكس وجهة النظر و الرأى و الرأى الآخر فكل ده مع شباب اليومين دول على نفس كلامهم (ما يكولش) طبعا الموضوع ده ليه جذور فى البيت و الأسرة و التربية و الأصدقاء و المشكلة الحقيقية مفيش قدوة أو مثل عندهم غير أزاى توصل بالفهلوة و النفاق و ده اللى بيخليهم مبسوطين قوى من كلام أغنية هابط أو فيلم مالوش لازمة أو واحد محشش عنده وقت فراغ ع القهوة و تطلع مصطلحات زى الفيلم ده قصة و لا مناظر لو قصة تبقى أقعد فى بيتكم لو مناظر ح تبقى مش ملاحق م الزحمة و سلمليى ع الأخلاق و أهوه كله ماشي و مش كده و بس اللغة دى بقت فى التعامل مع الأهل و الأسرة و البيت الأب و الأم و الأخوات مبقاش فيه حاجة أسمها أحترام و أدب الحوار ده كلام عفي عليه الزمن النهارده مع شباب اليومين دول لخص و نفضله و أحلقله مفيش وقت ح تقولي أخلاق و ذوق و أتيكيت و أدب قولتلك ما (ياكولش )فى اليومين دول أقولك سيبك منهم مش ح يتصلح حالهم مش بيقولوا يا ويل اللى ما تجيبوه نفسه ؟ مهوه اللغة بتاعتهم دى لازم تكون جاية من شوية صيع معاها جوانات بانجو و سجاير ملفوفة حشيش ولا كوبايات عاملنها خوابير و على رأى اللى قالوها زمان .. أنما الأمم الأخلاق ما بقيت .....فأن هي ذهبت ........عليه العوض
ليست هناك تعليقات:
إرسال تعليق